القصه ومافيها جبنا سواق هندي على اساس انه يعرف يسوق معه رخصه من بلده طلع ميح ومقلب كالعاده وربي ما اكذب انه جلس يمكن 7 شهور 3منهم زي البهيمه خالي يدرب فيه ويعلمه يقول مابي اسلمه السياره يعدمها ويعدمكم
و4 شهور ندربه ونتحمل رسوبه في مدرسة القياده ونشغله للمشاوير ام 3 دقايق و5 دقايق ويتوطا الارصفه زي الثور واحنا ساكتين وصكنا مخالفتين وحده 300 والثانيه 500 وكلهم دفعتهم امي
ووقتها كان زي القط الجوعان يادوب ينسمع صوته وبس راسه في الأرض لا يكش ولا ينش لأن كان عندنا سواق قبله واحنا نهيأه عشان يستلم مكانه والظاهر طول هالفتره كان مرعوب من وجود السواق الثاني وكل كلمه والثانيه ( مافي فايده اثنين سواق في بيت واحد)
وطلع الجنون براس السواق الثاني كل يوم يشتكي منه ( هو يسوي ازعاج * انا مافي نوم كويس * هو يسكر تلفزيون ) ومن هالخرابيط * السواق القديم ماكان ملاك بس احنا لانا نشوف هذا قمه في تصنع الأدب والإحترام ونصدقه ونصبره ونقوله هو شهر بس ويروح
المهم السواق القديم سفرناه بعد مافتحت عين هالزفت شويتين وقدرنا نسلمه السياره وطلعنا له الإقامه وطبعاً تأخرنا في اصدار اقامته وتحملنا التأخير *
الزبده اول ما استلم الإقامه وضمن اننا تورطنا فيه وسفرنا الأول تغيرت لهجته لسانه طال وعصبيته لاتطاق ويشتغل بالدف والمنه وماعلى لسانه الا كلمة (انا مافي فايده لازم زياده راتب كل صديق ياخذ 1500 ليش انا ياخذ 1200 )
وإذا قلنا له انت ماتعرف تسوق وهذا اتفاقنا مع المكتب قال : انا الحين مايعرف يسوق !! يعنني صاير محترف الحين !!
ماادري من وين يفهم المهم انه يشتغل بالجر مع انا والله يمر عليه احيانا اليوم واليومين ماعندنا مشاوير ولا يطلع انا الوحيده من اخواني اللي عندي دوام ودوامي يبعد عن البيت 10 دقايق وكله لطعات وتأخير
واحنا ساكنين في محافظه واحياناً اروح للسوق او مواعيد مستشفى في مدينه ثانيه المشوار ساعه اروح مع الوالده العصر ونرجع بالليل وهالشي يصير مرتين او 3 خلال الشهر بالكثير

وياويلنا ياسواد ليلنا ذيك الليله انواع النزر والتعصيب ويرجع طاير بيعدمنا من كثر السرعه وماعلى لسانه الا كلمة انا مافي اكل انا مافي انسان مع اننا نشتري له عشا او نعطيه فلوس ونقوله اعاشتك عليك اذا مو عاجبك اشتر يقول انا مافي فايده يشتري اكل لازم يرجع غرفه عشان يسوي اكل يعني نجيب له الغرفه والا نشيلها معنا
ويكملها ثاني يوم الصبح يقفل الجوال ويكبر المخده وانا انواع الدقدقه بالجوال واذا يأست رحت ادق على غرفته واطلعه وهو يلجلج ويقول انا مافي انسان انا يجي بالليل تأخير لازم نوم : اجاوبه واقوله انا سيم سيم يجي نفس الوقت ومافي مدير يكلم انا عشان يجي دوام اقوم من الفجر والبس واجهز وانلطع انتظر حضرة جنابه ووراي دوام طويل وهو كل اللي وراه توصيل ابو 10 دقايق ويرجع يكمل نومته عساها ما تخلص
وعبث انه يفهم او يستوعب اللي براسه براسه كذا مره يسوي نفس الشي ويخترع اي مشكله مع خواتي الباقيين عشان يرمي المفتاح ويقول انا مافي شغل عشان يذلنا ويستفيد من هالمشكله انه يريح يوم او نص يوم على اساس انه مضرب ومايبي يشتغل واذا طاح اللي براسه رجع ياخذ المفتاح