العمالة المنزلية, خادمات

11-05-2014, 08:13 PM

السلام عليكم

في ظل التعقيدات اللي تغث الواحد وتخليك اما تستسلم لجشع المكاتب او انك تكنسل فكرة الاستقدام من اساسه

ما اطول عليكم ، ظهر لنا نظام عقد العمالة الهندية

توجهت للسفارة لتصديق العقد تفاجأت بحارس الأمن يقول التصديق ماهو عندنا رح لمكتب VFS india مكانهم في البطحاء .. رحنا للمكتب وقال المسؤول ما تتسوى دايركت ووزع على المراجعين كرت مكتب استقدام وقال هذا يسنعكم .. اتصلت بملك السناعه واستفسرت عن السعر قال 1750 ريال !!!

صراحةً ويشهد الله على ما اقول اني قفلت السماعه ونيتي الغي التأشيرة واسترد المبلغ والله لا يرده من سواق ما بيه ..

وانا بالناصرية الا هذي الخارجية حولي قلت ماني بمتعديها خلني ادخل واشوف وش عندهم من علوم

رحت لقسم التصاديق وشرحت له الموضوع ، طلع لي نسخه من عقد له اتوقع 20 سنه عندهم

قال عب البيانات وجبه لي المهم ( اسم الكفيل والسائق والراتب ومدة العقد ) رجعته له قال جب 30 وعطينا الذيب صدّقه لي وقال ارسله دايركت على الهند وما جاك بوجهي هم اللي يبون العيشه بيدبرون امورهم

والله اني ترددت لكن توكلت على الله وطاوعت الرجال وارسلت الاوراق

على ما وصلت الذيب هناك رتب اوراقه وراح سفارتنا هناك ويومين الا وهو مرسل لي صورة تأشيرة جيّته للسعودية بالواتساب ولله الحمد

خلاصة الموضوع ان الرجال ابشركم معي بالمشب ومضبط الدلة واموره طيبه

الموضوع الحمدلله سهل جداً وكلها 30 ريال فقط رسوم الخارجية و 5 ريال تكسي من طريق الملك فهد للخارجيه ( لان وجود مواقف شبه معججججزه

)

الموضوع للاخوان اللي متعقدين من سالفة السواويق الله يعيننا عليهم

والامور الى الان متيسره باذن الله

والسواق يقول انهم في الهند يدفعون رشاوي لمكتب العمل عندهم عشان يجون لذلك هم بيحرثون لين يلقون لهم مخررج

بالتوفيق ودعوااااتكم