أسعد الله أوقاتكم بكل خير وسلام الله عليكم كثير منا يشتكي من قلة العمالة المنزلية ومن إرتفاع الأسعار ومن خلال تجربتي في الموقع إكتشفت أن المكاتب لهم النصيب الأكبر في الإعلانات والتنازلات ولكن السؤال المهم هل فعلا صاحب المكتب هو بنفسه الذي يضع الإعلانات فالجواب طبعا لا ليه لأنه يوجد عماله من جنسيات مختلفه والجاليه المصريه بكثره بالمكاتب هم الي جالسين يزبطبون الإعلانات ويحدد الأسعار طويل العمر علشان إذا جاء الكفيل يقوله إيه رائيك ياعم مشينا الوليه البتاعه بـ تلاتين الف ايه رايك ياباشا طبعا وبإسم المكتب الذي يعمل فيه البش مهندس وتتساءلون ليه ترتفع الأسعار طبعا الكلام هذا موجود في جميع النشاطات حتى العقاري علشان فيه ناس هدفهم الربح مهما كانت حاجة الناس مانقول لا تترزقون الله وتربحون ولكن بدون مبالغه حتى في حالة نقل الكفاله بعضهم يكون متفق مع السائق أو الخادمه أن يضرب عن العمل ويطفش الكفيل علشان يسفره ويأخذ نصيبه من البيعه فالحذر مطلوب بالعربي مافيا استقدام والي يزيد الطين بله اللحين المكاتب مسوين اضراب جماعي على الاتفاقيات الي سوتها وزارة العمل لانه وزارة العمل الله يجزاها خير ماكملت جميلها واتفقت مع باقي الدول المصدره للعماله وبكذا يكون الفلبين 15000 وبنقلاديش 7000 طبيعي صاحب المكتب يبي يدور على مصلحته وأزودكم من الشعر بيت من خلال قراءتي لمشاكل الإستقدام المفتعله بعض المكاتب يستكثر على مكاتب تصدير العماله في الخارج مبلغ محترم ويحاول يفاوضه على طفسه من المبلغ الي ندفعه له علشان يكون له نصيب الأسد وهذا الي يخلي المكاتب في الخارج تمتنع عن إرسال عمالتها مع العلم إنه 75% من العمل على المكاتب بالخارج والمتضرر طبعا الأول والأخير المواطن لو يفتحون إستقدام الأفراد بشكل مباشر ماغابت الشمس إلا وحاجتنا إنقضت بدون وسيط يطول السالفه وهي قصيره
ضيقوا علينا في أنظمتهم والحرب الشرسه بين المكاتب والشركات بالإضافه إلى سوء المعامله من بعض الكفلاء لمكفوليهم ولا أعلم من المستفيد هل يعقل خادمه تكاليفها ماتتجاوز 3500 ريال شامل جميع التكاليف حتى توصل للمطار يتم التنازل عنها بهذه الأسعار المرتفعه اتق الله يامدحت وعين خير لنتعاون يداً بيد حملة خلها تصدي لين يفرجها الله ونبحث عن البدائل

وعليكم السلام ورحمة الله وبركاته
طبعاً صاحب المكتب والموظف مشتركان بالدعاية والتسويق للخادمات وآبشرك صارت المرآة تشاركهما بالتسويق والدعاية الوهمية حتى تحصل على نسبتها التسويقية من تلك المكاتب !!
والضحية أنا وأنت !!!!
والله يرحم حالنا ومن كذا الأسعار في آرتفاع بلا حسيب ولا رقيب ...

يروي لي احد الزملاء انه كانت لديه خادمة عملت لديه فترة ..المهم الخادمة بدات بالتذمر مرة من الشغل ومرة من البيت ... وبحكم ان الشخص كان علي وشك السفر في دورة طويله المهم يقول دخلت الموقع ..الا والله الاعلانات اللي تحسسك انهم صافين وراك...نعطيك ماخسرته ..مانخسرك ..تاخذ فلوسك علي طول ..الخ
يقول واسجل تقريبا حوالي خمس ارقام ...وابدا بالاتصالات....المحصله ..كلهم من جنسيه عربيه واحدة ...طبعا جميعهم يحاولون ايهامك انهم في صفك والصحيح انهم يبحثون عن الربحيه من وراك وباي طريقه ....المبلغ مايدفع الا بعد فترة وبعد ماياخذ المكتب اتعابه وينقل الكفاله....شغلهم كله غير نظامي حتي لو اوهموك بالعقود وخرابيطهم واستلاماتهم....محاوله انزال المبلغ لاقصي حد وكانهم يشترون سلعه ومن ثم محاوله الاخذ والعطاء الاهم كيف يربح من وراك ...بعض كفلاء المكاتب اخر من يعلم ...غالبيتها مكاتب خدمات...ماعندهم مشكله ياخذها منك بسعر ويعطيها شخص اخر بسعر اخر مبالغ فيه جدا ...
في الاخير يقول اعطيتها زميل ونقل كفالتها وفكيت نفسي من شي لااعلم كيف بتكون نتائجه ....