|
سواقي وطريقة التعامل معه !
السلام عليكم
عندي سائق ولو م الحاجة ماايجلس عندي دقيقه ، لكن الله يكون بالعون! ماعنده شغل كثير وغالبا متكئ بغرفته ومريح ! لكن اذا طلعت جنني وكرهني بالطلعات بداية من العشاء لازم اوفر له عشاء وعشاء يملي عينه طال عمره وإلا قام يبكي وانا مسكين وانا ماعرف إِيش ! مع العلم أني ماقصر معه واللي أعطيه ياكله أحسن من اللي أكله أنا بعد وإذا مااعطيته عشاء أعطيه فلوس عشاء ولاحظو ان طلعاتي قليله جدا ( طبعا العشاء اذا طلعت بس لان الطلعه تكون بعيده عن بيتي وينتظر بالسيارة فأضطر اعشيه ) طلباته كثير أبغى هديه ( فلوس ) زيادة أبغى 10 ريال أبغى 20 اخر طلعه من طلعاته يبغى زيادة راتب مع العلم انه ماكمل سنه ومازال عنده قل دبره و بلاده ! أنا للأسف كنت ارحمه ولاتوقعت انه بيطولها لهالدرجة ! صار يتمادي وإذا ماسويت اللي يبي زعل وحط حرته بالسيارة ولاعندي اللي يوقف بوجهه يأدبه مره رفع ضغطي وتهاوشت معه وقلت له بوديك المكتب ماابغاك وانهبل وبكى واعتذر ومشيت الموضوع غير انه اذا ركبت معي صاحبتي او قريبتي يسرع بالسيارة ويسوي الأشياء اللي تعصبني وعشانه يعرف أني ماراح انطق ومعي إحد اذا نزلت من السياره يرجع المسكين اللي مايسوي شي ! اليوم طلب مني فلوس للغاز ورفضت مع العلم أنه من يوم جاء عندنا أنا اللي اعطيه فلوس الغاز وبعض مقاضيه من حسابي ! لكن أنا ندمانة قد شعر راسي أني كنت أسوي كذا لانه اذا اكرمت اللئيم تمرد وهو زودها طلبات راتبه حسب عقد المكتب يتضمن المأكل والمشرب الان اخواني واخواتي الكرام أعطوني اُسلوب للتعامل معه لانه مطفشني �� هل سواويقكم كذا وإلا أنا سواقي كذا من الدلع ! يمديني اعدل بعض التصرفات معه وهل بيتعدل ؟ أنا حاليا أفكر اذا خلصت إقامته اسفره وأُقدِّم ع جديد ! هل هو حل وإلا مشاكل وقرف السواويق واحد ؟ دعواتكم الوحدة تجيب سواق عشان ترتاح ماتدري انها تبتلش زيادة �� |
يبدو انك كنتي كريمة معه بالمرة واستغل هالنقطه فييك ...ولكنه لللاسف مهوب كفو لانه درس نقاط الضعف كلها وعرفها .... هذا ممثل كبير ...ومهوب بسيط ههههه ... نصيحتي انك تجيبين العقد اللي سبق وتم التوققيع معه ..وتخلينه يشوفه ويشوف توقيعه ...وعلشان تحلين كل مشاكلك ومواضيعك معه خاصه كثرة الطلبات ...وتقولين انا ابزيدك خمسين ريال ولكن ماني مسئوله عن اي شي وتريحين راسك من كل مشاكله بمافيها طلبة لزيادة الراتب ....ولا تعطينه اي شي باي مناسبه ...ولاتنسين انتي ماذكرتي كم راتبه علشان نعرف هل هو قليل ولا كثير ولا في المتوسط. تسالين هل السووايق كلهم كذا الجواب فيه من هو اسوء منه وفيه من هو افضل منه بمراحل ..حسب شخصية الواحد وتربيته ... حاولي ماتسمعين له كثير ولا تشغلين راسك فيه ومشاكله ...طبيعي اذا حصل احد طيب بزيادة تبي تكثر طلباته ..المشكله مهيب الطيبه معهم المشكله زيادة الطيبه يتوقعونها ضعف فييك وذكاء منهم علشان كذا لازم الواحد يكون شديد وصارم الي حد ما .... انتظري فترة وشوفي اذا تغيرت تصرفاته ...ولا نصيحه هذا لاينفع لاطبخ ولا شوي ... شوفي لك واحد بديل وربي بيعوضك خير ...والسائق شر لابد منه ..تحياتي ... |
اقتباس:
جزاك الله خير اخي ، ردك قريته بعناية وراح اطبقة حرف حرف ان شاء الله .. وفعلا انا كنت كريمه معه بغباء ! لكن درس نتعلم منه .. |
لا تضيعين وقتك ومالك مع هذا السواق نيته ما هي زينة أبداً مهما أُكرم فيضل جاحد للجميل ،،، والسواق حظ يا نصيب كالشغالة ،،، وآنصحك بتسفيره لأنه صار مثل شجرة الشوك لا يستظل تحتها ولا تقي من الشمس ولا منها ثمر ،، الله يعوضكم خيراً منه ...!!!
|
اختي الفاضله ان كان عندك رجل تثقين فيه فاانصحك تخلينه هو اللي يتفاهم معه ،من تجربتي السائق يخاف من الرجل اكثر من المرأه .حتى لو يكلمه زوج وحده تثقين فيها .يقوله كل اللي في خاطرك .ونصيحتي تحاولين تتحملينه لين تقدمين على جديد .انا اللي عندي اسوأ من حقك بمراحل ومتحمله عشان الحاجه وجربت قبله العديد من نفس الطينه والى الان لم يوفقني الله في سائق طيب ومحترم .اسال الله ان يسخر لنا العماله التي لا نرى منها الا كل خير
|
| الساعة الآن 09:25 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir