موضوع للنقاش
 

حسبنا الله ونعم الوكيل

الصراحه كلامك سليم. بس تدرين فيني الضحكه ع المواطنين هالحين تبينهم يتعاونون كيف يبي يتعاونون وهم يتزايدون في الاسعار يعني مثلا يجي واحد يبي يتنازل اقصد يبي يبيع شاته اللي عنده ويقول لاعلي سعر ويجيك المواطن مطفي النور يحسب انه في سوق غنم ويبدون المزايده في الاسعار ع بعضهم والمستفيد صاحب هالخادمه اللي لوهي سنعه ماعرضها للتنازل. الله يجزاك خير اختي ع الموضوع بس انسي ان المواطنيين يتعاونون في كسر سوق الغلا للخادمات. للاسف الشديد مافيه تكافل وتعاون في مجتمعنا ابد الكل يريد ان يحصل ع مايريد وبس من دون مراعاة احوال الاخرين او من دون ان يعرف مدى حل وحرمة هذا المال الذي يحصل من ورا هالمزايدات والبيعات الغريبه للخدم وكأنا تحولنا لسوق نخاسه وليس تنازل عن كفاله وننسي ان هذه الخادمه انما هي بنت ناس حرة نفسها ولم تأتي لهذا البلد الا بعقد عمل للعمل وليس للتنقل في البيوت من اجل ان يحصل كفيلها ع ( بيعة طيبه من سومة طيبه ) وكأنها عبده مملوكه وليست امرأه حره لم تأتي الا بسبب الحاجه للعمل والمال والا لوعليها ماطلعت من بلدها وقابلت هالوجيه السمحه اللي بمجرد شافوا واحد يبيع بغلا وأخر اشترى بغلا بشكل هستيري راحوا يقلدون وينظرون للخادمه ع انها سلعه يجي من وراها كم هائل من القروش. اقول الله لايشفحنا ولا يفتنا بالدنيا. عذرا ع الاطاله اختي وعذرا اخواني عما قلت بس الصراحه الموضوع زاد عن حده.

كلام كله جميل بس شنو الحل في نظركم؟

كلامك صح رانيا
طيب لوجتك عجوز راتبها الف وثمان من وين لها شغاله ب10 الاف تقديم ولا بالفين شهريا
عطوني حل لها

ليه ساكتين عن الموضوع او عاجبكم الوضع الي نحن فيه

الله يحفظكم جميعا تبون الصدق مافيه حل تدرون ليش لان الاخوان اللي معاهم فلوس الله يجزاهم خير عادي عنده بيدفع الى الاربعين الف في خادمه مافيه مشكله عنده ماراح تهتز ميزانيته وهذا اللي يخلي الناس المشفوحه ع القروش تعرض بهالاسعار اذا فيه احد بيدفع كثير فيه احد بيعرض بكثير وطبعا من جهه اخرى فيه ناس ماعندها قروش بس الحاجه تجبرهم ويروح يتسلف ويتدين عشان خادمه الله المستعان العالم يطحن من حولنا والمسلون يبادون في كل مكان ونحن نتزايد ع بعضنا في اسعار الغنم عفوا اقصد في اسعار الخدم. الحل انه نرسل شكوى لمكتب العمل ونشوف وش بتصير النتجيه لان النظام الاسلامي التشريعي لايسمح بهذه المبايعات ويمكنكم الرجوع لموقع صيد الفوائد وقراءة موضوع منزل في الموقع بخصوص الغلا وراح تشوفون ان كلامي صحيح مئه بالمئه. الان كل من يستطيع ان يرسل شكوى فليرسل لمكتب العمل والوزارات ذات الشأن لتنظر في الموضوع ونظامنا حنا هنا نظام اسلامي واكيد بنرجع في كل مبايعاتنا للاسلام الذي لايسمح بمثل هذه الاسعار.

ياليت فضلا لا أمرا رسالة شكوى على دربك لعلهم يخفضون اسعار العقار لأن الدين الإسلامي مايرضى بإستغلال الناس فيما مضى 500 الف تجيبلك احلى فله وهالحين ماتجيبلك خرابه.
وبالمره رسالة شكوى على وكالات السيارات اول 30 الف تجيبلك سياره جديده وهالحين ماتجيبلك دباب.
الخروف اول تاخذينه ب500 ريال هالحين فوق 1500 .
نصيحه ارتاحي بس ولازال للإرتفاعات بقية أذكر قبل كم شهر عرضت خادمة أندونيسية عندي ب20 الف وأكلوني بلا ملح ونصحتهم ياخذون بالعشرين قبل توصل 30 وهالحين مابي أنصحكم تاخذون ب30 قبل توصل للأربعين الف أخاف تزعلون علي وأنا لاناقة لي فيها ولا جمل والله على ماأقول شهيد.

الخادمه ادمي لها رجلين ومعها عقل وعندها جرئه مب زي اللي قلت يعني بدفع 30 الف ومن بكره منحاشه معلش اخوي البيت بسكنه ويبي يقعد لي السياره بسوقها وبتقعد لي الخروف باكله وانتفع به اما الخادمه صعبه مره.

طيب اللي يخليك قادره على قيمة البيت بهالأسعار وتسكنينه وقادره على قيمة السياره وتسوقينها وقادره على الخروف وتاكلينه ... ماراح تضرك 30 الف لو دفعتيها بشغاله واذا هربت تعوضي الله فيها.
حتى السياره ممكن تاخذينها ب 120 الف وتصدمين فيها وكذلك البيت والخروف مافي شي مضمون بهالدنيا.

ارسل شكوى لمين ولا لمين
بيت مستحيل تلقى ب500الاف ولا حتى ارض في العزيزيه الي عند المجاري
سيارات مالي خبره فيها بس كل شي مدبوول حرام الشغاله تلقاها منحاشه وتتشرط عليك بالفين وخمس مئه وان جبتها تكره شغل وراها مغير كحه واستفراغ
ماتدري وش هالامراض الي فيهاوالي من عند حرمه ثقه وصلت 5 الاف
قل لي وين اجيب خمسه وراتب الوالده الف وثماان بالله عليهم
حسبي الله عليهم
والذبيحه الحين حد الواحد دجاج دو وتخب عليك من غلاء هالاسعار

ايه والله كلامك جد حرام ادفعها ومن بكره منحاشه انا جبتها مقدمتها وحول 7الاف ايام الرخص شهرين ونشبت لين ودينا راتبها وانحاشت
يعني مو قهر شي يقهر

الله يكون بعون المسلمين

والله هذا ما اسميه الا فسق وطغيان والسبب يرجع كما قالت اختي رانيا يالي عنده افلوس ما تهمه

والي راتبه مثل ما قالت الاخت جنى 1800 والله انها ما تعيشه

لازم نفكر في الجميع لا بانفسنا وبس

اعرف وحده عجوز كبيره جداً في السن ولا يوجد لديها اولاد وتستلم من الشؤون 1500 وكانوا

اهل الخير مو مقصرين معاها يودونها وجيبونها ويلبون حجاتها وكانت عندها خادمه من سنه ونصف

والله ان راتب العجوز يكون نصفه راتب لشغاله لتخدمها والنصف الثاني يكون مصاريف اكل وتبون الصدق والله ما تكفيهم

وهالحين الله يرحم باحالها جالسه عند جيرانها الله يجزاهم خير ويوفقهم دنياء واخره يعني ساكنه عندهم والشغاله باي باي

والله ما تقدر على تقديمها يوم وصل 14000 يبي لها + حق التاشيره 2000 يعني يبيلها 11 شهر ما تصرف ريال واحد

ياجماعة الخير لحد يفكر في نفسه وبس الحمدلله انت الله رازقك و معطيك العافيه وتروح وتشتغل وعندك ماديه بس فيه غيرك

والله ماعنده يالي يصرف على اعياله منه الغلاء دمار ولا يوجد رادع لهاذا الشي مثل ما قال اخوي متعب

السياره والبيت الخروف وحاجات كثيره ارتفعت اسعارها وهالحين وصلوا الى العماله يالي هم الخدم صارت تجاره عندهم

وما اقول غير حسبي الله ونعم الوكيل بالي يستغل المسلمين ويطمع في رزقتهم

ويعطيك الف عافيه يا اختي جنى على الموضوع الرائع ولاكن ما اعتقد ان المواطنين يكون بينعم تكاتف ومساعده وتقدير الاوضاء

واشكرك يا اخت رانيا بصراحه كلامك جميل جداً وانا مؤيدك عليه وفعلاً حرام ادفع مبلغ كبير واخرتها مناحشه

وانت يا خوي متعب سجل لي شكوى وارسلها معاك بكل الي قلته تحياتي لك

واتمنى وجود جهه مسؤوله وتدخلها في المهزله هذي يالي صايره

بيع خدم باسعار كبيره وخدم تاجير من العامله نفسها او من صاحبتها هذا يشكل خطر على المستاجر ولاكن وش حادك على المر قال الي امر منه

والله صرنا زين الناس يالي يتلعبون في الاسعار ولاكن بطريقه ارتب شوي وعلى الاجانب فقط

صرت افتح موسسات و ومصانع وورش حداده وسيارات ومناجر

ليش على شان اطلع الفيز وابيعها على العماله باسعار فوق الممتازه وبعدها اهيته في الشارع واخذ عليه كل شهر 300 ريال

يعني مدخلي في الشهر اللهم لا حسد في الـ 100 عامل 30.000 ريال من غير حق التاشيرات يالي 15000 والي 12000 وكلاً حسب الجنسيه ولاكن انجبرنا ونبغى زين الغير

ولاكن فيه غيرنا ماعنده القدره لاستخراج هذه الموؤسسات ولو الكل اشتغل فيها كان لقيت العماله اكثر من الشعب والفايده لهم

فقط ........

وان شاء الله تفتح الشركه باسرع وقت يالي الكل يسولف فيها وتحل ازمت الشعب في موضوع العماله بوجه عام

وتقديري للجميع

وبالتوفيق ان شاء الله

الله يجزاك خي يابو تركي على كلامك الرائع
يعني توصل مواصيل تاجير الخدامه ب5 الاف وش دعووه وش عليه لو انها ايش راتب مدرسه توها متوظفه
ارحموا الناس الي رواتبهم على قدهم حسبي الله عليهم

ويجزاك خير يا اخت جنى

لا وافيدك ياجنى راتب المدرسة يالي في المدارس الأهليه ما يتجاوز 1500 ريال للمعلوميه