|
هل ما قمت به صحيح؟
السلام عليكم ورحمة الله وبركاته،
اخواني اخواتي ... قبل 3 شهور قدمت على خادمة اندونيسية عن طريق أحد المكاتب بالدمام (مكتب فهد للاستقدام) وقبل 5 ايام اتصل علي المكتب قلت ان شاء الله انها وصلت الخادمة . لكني تفاجات أن المكتب يريد مني أن أدفع 2000 ريال زيادة بحجة أن اسعار المكاتب الوسيطة باندونيسيا قد ارتفعت . فقلت له يا اخي انا متفق معكم على مبلغ 8000 ريال (شاملة الفيزا) ، فبأي حق تريدني أن أدفع لك زيادة؟ واذا كان هذا الامر صحيح المفروض تطبقونه على العقود الجديدة فقط . فرد علي وقال لي والله براحتك ماتبي تدفع ما فيه خادمة!!! بعدها ذهبت لهم للمكتب وطلبت منهم الغاء العقد واعادة فلوسي كاملة فوافقوا . السؤال : هل ما قمت به صحيح؟ أم كان علي أن أدفع الـ 2000 ريال حتى لا اخسر مدة الانتظار التي وصلت الى اكثر من 3 شهور؟ خاصة واننا لازلنا بحاجة للخادمة. الغريب في الامر ان موظف المكتب اطلعني على ايصالات كثيرة لناس دفعوا الزيادة بدون تردد. لكني رفضت عندما احسست ان هذا عبارة عن جشع من صاحب المكتب وعدم التزام للعقد الموقع بيننا. فلو ان ما حصل كان العكس وان الاسعار نزلت . هل تعتقدون ان المكتب سيرد لي المبلغ الزائد؟ لا اظن ذلك ابدا. |
اخوي راهي ...
اتمنى اني ارد على تساؤلاتك بكل شفافيه ومصداقيه بحسب قربي من مكاتب الاستقدام .. مشاكل اندونيسيا بدأت مع المكاتب من تاريخ 1/9/1431هـ عندما اجبرت لجنة الاستقدام السعوديه اندونيسا على تخفيض رسوم الاستقدام من 8000 الى 6000 من هذاك الوقت اللجنه ابلغت المكاتب برفع السقف الزمني إلى 6 شهور في العقود تفادي للمشاكل اللي راح تحدث وفعلا حدث اللي كانت اللجنه تتوقعه تأخير .. إعذار بعدم وجود خدم من رمضان لحد الحج ومن ثم بدأت اعذارهم بـ مشكله خادمة المدينه وابها وقيام اكثر من اقليم بااندونيسيا برفض ارسال العماله المنزليه للسعوديه لاإنها بلد ضرب وعنف وقتل وتأخير رواتب المهم الحاصل كثر من العملاء راحو إلى مكتب العمل واشتكو المكاتب ان المكتب مستقصد التأخير قامت غرفة الشرقيه بإرسال خطابات ورئيس لجنة الاستقدام صرح اكثر من مره ان الاستقدام من اندونيسيا راح يطول بسبب مشاكل وهو اصلا معروف وش يبون ووش سبب هالمشاكل يبغون رفع الرسوم إلى 8000 المهم الاسبوع الماضي بعد ما اغلب اصحاب المكاتب راح اندونيسيا وشاف الوضع وعرفو ان سبب التاخير ان السماسره اللي يجلبون الخدم إلى المكاتب رافعين الاسعار فـ شي طبيعي كيف اقدر اوفر اكثر من خادمه لااكثر من عميل دافع لـلمكتب 6000 وهم يطالبون المكتب بسعر اعلى من اللي العميل دافعه ...؟ فـ خاطبو اللجنه ان السماسره رافعين الاسعار وش الحــل **؟ الحل معروف منذ مبطي تلبية رغباتهم وإرجاع الرسوم كما كانت إلى 8000 ريال لإن فيه ناس كثير محتاجين للشغالات ولو المكاتب مارفعت باانفسهم راح يروحون ويجيبونهم بالسعر هذا . . هذا هو الحاصل فـ اغلب الناس دفع الزيادة وتم اختيار له خادمه والمكتب يوفرها في اقرب فرصه اما تسحب فلوسك ** 6000 ريال والتأشيره بيرجعونا لك وش بتسوي بترجعها لمكتب العمل وعلى شهرين لحتى مايرجعون لك الـ 2000 ولا تروح مكتب ثاني وتجلس 3 او 4 شهور . .؟ كان مفروض تحكم عقلك وتقتنع بالحاصل .. لاإن المكاتب لو تبي تزود من كيفها راح ينسحب الترخيص ويعاقب المكتب وصاحبه . . اتمنى إني وضحت الفكره لك اخوي |
اخوي معليش لكن هل ما قام به المكتب نظامي ما هو على كيفه يدفعني الفين ريال من راسه والعقد اللي بيني وبينه فقط 8 الاف ريال وباصبر لين تخلص السته شهور ويدفع عن كل يوم 30 ريال لين يجيب شغالتي نظامي ولا يخسر العقد شريعة المتعاقدين وهو ملزوم بتوفير شغاله او دفع مبلغ التاخير
|
المشكله تدري وين أخوي
المشكله إن في ناس على اتم الاستعداد لدفع ضعف المبلغ لأجل الخادمه أنا قد وصلت خادمتي في شهر 10 وبشهر 12 واحد يدور على خادمه لما دري إن عندي خادمه عرض علي التكلفه وفوقها 5000 ريال تخيل يعني أنا دافع للمكتب 7000 ريال والتاشيره 2000 وفوقها 5000 يعني الاجمالي 14000 ريال هنا المشكله والطامه الكبرى اللي تدوينا لورى |
لا والله الي سويته عين العقل لمتى نفضل تحت رحمتهم لو كل واحد سوى الي سويته واتكومت الشغالات في وجههم كان عرفوا ان الله حق الواحد يدفع 10 الاف عشان شغالة وتجي الاخت 3 شهور وتقلك مع السلامة ربي لا يوفقهم ولا يكسبهم زي ما هم مخربين في البلد
|
| الساعة الآن 07:29 AM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir