ودي اعرف ايش فايده الي يطمع السواق ويخليه يضرب عن العمل
 

السلام عليكم
منزله الموضوع وانا ميته قهر
من 9 شهور جاء عندنا سواق علمناه السواقه طول اليوم ابوي وزوجي واخواني بس يعلمونه السواقه يبونه يتعلم بسرعه خلال شهرين طلعنا له رخصه وعلمته شوارع الرياض واسواقها
حتى السياره زوجي علمه كيف يعرف اعطالها ويغير كفرات السياره يعني علمناه كل شي والسواق مريح 24 ساعه بس مشاويري لدوام و نادر ما يطلعني مشوار بالليل
وحتى علاجه على حسابي وراتبه كان 1300 ريال واول ما كمل 6 شهور طالب بزياده ل 1500 اعطيته زياده غير كذا فطوره وغداه من عندي حتى بدايه رمضان طلع واعتمر على حسابنا وتكفلنا حتى باكله وشربه خلال فتره عمرته
والي قاهرني انه خلال شهر 8 و 9 جلس بدون شغل لأن ما فيه دوامات وشهر 8 كامل كلنا مسافرين وبشهر رمضان انا ما اطلع من البيت ابد استغل هالشهر بالعباده
وباخر يوم من ايام رمضان ركبت مع السواق طلعت مشواين بسيطه ماتتعدى ساعتين وكان بس يتأفف ويقول اليوم مشاويرك زايده وانا حاقرته وثاني يوم العيد طلعت معه مشوار الساعه 9 بالليل ورجعت على 2 بالليل ونزلني للبيت فقلت له بكره الصباح الساعه 10 تعال وودني للمستوصف نزل من السياره ورمى علي المفتاح و وجلس يهاوشني وشوي ويضربني يقول مافيه وقت انام واصحى وانا مابي اشتغل عندك وعطيني جوازي بروح اشتغل عند ناس ثانين انا وقتها قلت له هات الاقامه والرخصه وخلاص ماتبي تشتغل تسفر قال لا بشتغل عند ناس ثانين وعطاني الاقامه وقال الرخصه لا لأني بشتغل عند ناس ثانين انا اخذت الاقامه ودخلت للبيت وبنتي تبكي تقول لي دخلي للبيت لا يقتلك
طبعا علطول كلم زوجي و جلس يبكي ويقول لزوجي كلام مش فيني وزوجي اتصل علي يسأل قلت له ايش صار وان السواق اضرب عن العمل وتصرفه الي سواه لازم يتعاقب عليه روح وبلغ عليه الشرطه وانه متهجم علي اخر الليل وكان شوي ويضربني فراح ينسجن لحد ما يسافر لان هالسواق مستقوي ولازم له كسره خشم ويطلع من السجن للمطار
زوجي قال لا .. واسبوعين وتبداء الدوامات خلينا نتفاهم معه لحد ما نحصل غيره راح يكلمه قال ابي عيديه 3000 وراتب 2000 ولا انقلو كفالتي احنا اخذناها من القاصر وسفرناه طبعا زوجي سأله لمين تبي انقل كفالتك السواق طلع السواق متفق مع جارنا انه يسافر ويرجعه لان جارنا مايبي يتكلم مع زوجي ويخاف زوجي يطلب منه مبلغ لنقل الكفاله فأفضل شي يسفره ويرجعه
من يومين اشوف السواق يترزز عند باب جارنا وجاي قوي الوجه لزوجي يقول له رجعت في اقل من شهر وانا سافرت وكانت معي تأشيره من جاركم وكفيلي الجديد راح يعطيني راتب 1800 ريال مو مثلكم 1500
انا اقول لزوجي روح لجارنا وتهاوش معه هالي ما يستحي الله لايوفقه من اول ما عرفت وانا امنيتي يعدم له كل سياراته علشان يعرف كيف يغرر بالسواق لو ان السواق ضارب عن العمل بشهر رمضان او شهر 8 ما قلت شي فيه وقت اطلع فيزه سواق جديد لكن يضارب عن العمل قبل الدوامات باسبوعين من جد شي يقهر الحين انا متبهذله انا وببنتي مع سواقين الشهر
السواق الي يوديني لدوام كل يوم زايد علي السعر واذا قلت له غالي انت يرد بكل برود ويقول دوري غيري مافيه امل تحصلين سواق يوديك لحالك ب 2600 ريال
وبنتي مسكينه تبهذلت مع سواقين الشهر والباص مسكينه من 5:30 الفجر تطلع ويلفون بها شوارع الرياض والرجعه ترجع الساعه 2 ترجع دايخه
وسواق الي دربناه وعلمناه راح ورجع جاهز لجارنا الله لا يهنيه فيه ويسلط عليه من ما يخافه
كثرت كلام من القهر بس ودي اعرف جارنا وش استفاد لو انه قدم على سواق جديد مو افضل له من انه يطمع سواق الغير
ودي اعرف وش يستفيدون الله لايوفقهم ولا يهنيهم بالعماله الي يغررون بهم

حسبي الله عليه جاركم هذا والله مافيه خير والله حسيبه صدقيني لاتنقهرين يوم بيقلب عليه هالسواق بس غلطت زوجك لمن سفره كان سوا له البصمة في القائمة السودا علشان ياكلها مايرجع الا بعد سنتين حسبي الله عليهم اثنينهم والله يعوضكم خير ياعزيزتي

حسبي الله ونعم الوكيل
اتحسبني فيإم الين الله يرجع لك حقك

والله شكلها هذي الحكايه موضه جديده عند السواقين
سواق اختي بس يوصلهم للمدارس ويقولها شوفي اذا فيه مشاوير ثانيه انا انقل كفاله عند جاركم هو يعطيني 1500
لا الجار يحترم حق الجيره ويكفي الناس شره ولا السواق محترم الناس الي جايبينه ومسكنينه وماكلينه
بس ما نقول غير حسبنا الله ونعم الوكيل
حقوقنا ضايعه بس ربنا يفرجها

صدق من قال الجار قبل الدار

هههههه حتى شغالات امي كويسات وزينات وامي ماعندها شغل كثير لان ما عندها اطفال ويجو جارات امي لو ماحصلو امي بالبيت يقول للشغالة انتي سافري واحنا نرجعك ونزودك بالراتب
لان شغالات امي يارب لك الحمد كلهم الي جوها كويسات والجارات طمعو فيهم
حسبي الله ع الناس اللي ماتستحي

المشكله ان عندنا صارت سرقة العمال عيني عينك يجيك الجار او إيجاره ويقولون تعالو عندنا إحنا كويس وهذا لا

اولا الله يعينك و يعوضك خيرا منه ....

ثانيا ... هذي حقيقة تغطرس السائق او العامله المنزليه ... بسبب انهم صاروا يكشفون اسرار البيت الماليه بموجب التسوق و السفر و ما شابه ... و يقيسونها علي انفسهم بحكم انهم جايين للحاجه ... و بدلا من النظر الي انها نعم الله يعطيها من يشاء و يفضل من يشاء على عباده .. للاسف ينظرون لنا العماله بعين الحقد و الكراهيه و الجشع .....و افضل طريقة في هالحالات .. ان احنا نتغافل عن طيبتنا الزايده اللي ما استفدنا منها الا وجع الراس .... و اذا صار زي حالتك المفروض ابلغ الجوازات بطريقة ما و يكون في القائمة السوداء .... لاجل تكون عبره له و لغيره .... و لايجيني احد يوطوط و يقول قطع ارزاق .... يعني اللي سواه في هالمسكينه وشو اجل ......

خلصنا ازمة الشغالات بدوا السواويق
لاحظت كثير يتذمرون من هالموضوع ان جيرانهم
وناس من الشارع يمسكون السايق ويخربونه ويقولون
نعطيك زيادة المفروض اللي يسافر قبل انتهاء المدة ماعاد يدخل السعودية
حركة السواويق هذي اشوفها انتشرت وبقوة

المشكلة الاساسية تبدأ من السواق لما يستغل حاجة الكفيل ... و يضطر يزود راتبه .... المشكله الثانيه لما يقابل السواق اصحابه و يخبرهم بالزياده و يبدأون بالاعتراض علي كفلائهم .....

الاهم لو كان هناك نظام و عقد مفصل بين الكفيل و المكفول يوضح جميع النقاط .. ومنها الزياده تكون بعد فتره معينه حسب تقييم ادائه ....و لايحق له قبل ذلك ....لكن للاسف لايوجد لدينا هالشيء

حسبي الله ونعم الوكيل
نفس الشي صار لسواقنا جاه واحد واغراه بصراحه وخربه علينا
الله يعطيه مايكرهه في نفسه هذا اللي اقدر اقوله

حسبي الله عليه جاركم