عمالة, خادمات, العمالة المنزلية - عاجل مشكلتي مع سواقي من يدلني الله يعافيكم

السواق متعوده اعطيه راتبه باليوم المحدد وهالشهر تأخرت عليه اسبوع واحد فقط ويوم السبت الماضي قلت

له راح اصرف واعطيك راتبك بكره بإذن الله وثاني يوم واحنا راجعين من الدوام صدم بسيارتي

وهي جديده من الوكاله مالها الا كم شهر * وصارخت عليه لأن هذي ماهي اول مره قبل كم شهر

شطف بويتها بجدار مادري شجره وعديتها وتحملت التصليح وهالمره عصبت عليه وهزأته وقلت له

التصليح عليك في البدايه لجلج وعاند كالعاده وبعدين صار يتذاكى علي يقولي اعطي انا راتب

اسوي تصليح قلت لأ انا اروح التصليح واشوف كم تكلف واخصم من راتبك اعترض طبعاً وطنشته

ومشيت تفاجأت إنه ثاني يوم رامي المفتاح في الحوش ورافض العمل ولما قلت له ليش قال

هاتي راتب انا اصلح بعدين انا سفر قلت مالك لا سفر ولا راتب والسياره خربانه سكت وطبعاً

كان مخطط على نيه زي وجهه انا ثاني يوم دبرت نفسي مع سواق عشان اشوف وش وراه بعد

هالاضراب مابي اتذلل له واعطيه اكبر من حجمه ورحت لشغلي لما رجعت لقيته للحين في الغرفه

اللي مستأجرينه له ويطبخ غداه ومروق و معطي امي ورقة استدعاء بإسمي للحضور للجنة

النزاعات في مكتب العمل ويطالب بالخروج النهائي والمتبقي من رواتبه يعني كأنه بريء

ولادمر سيارتي والرواتب مستلمها وموقع عليها الى ماعدا الراتب الاخير اللي ماله الا كم يوم

وعلى فكره انا جبته مايعرف لا لغه ولاقياده ودربته وعلمته وصبرت عليه وعشان احفظ حقي

وقعته على عقد من بنوده انه في حال رفض العمل قبل اكمال السنتين يدفع لي تكاليف

الاستقدام والاقامه وكل ريال صرفت عليه وانه يتحمل تلفيات السياره وموقع بنفسه على هالعقد

واخذ منه نسخه طبعاً رماها مادري ضيعها والنسخه اللي عندي باقيه طبعاً طردته من الغرفه

وغسلت شراعه

الحين الاسئله

الجلسه في مكتب العمل يوم الاثنين القادم وش ممكن يصير لو طنشت الحضور

وكيف ممكن تتوقعون يحكمون في الموضوع

انا الحمدلله موقفي سليم وواثقه من نفسي بس خوفي ان حضوري يكون في صالحه لانكم تعرفون ربعنا ماشالله على طول صافين مع العماله

وكثير قالوا لاتروحين لانه غيابك بيكون عامل ضغط عليه وبيجيك يعترف بغلطته زي الكلب خصوصاً انه متعطل ويدري ان كل يوم اضراب = يوم بلا راتب

اما لو رحتي فحتى لو حكموا لصالحك بيدعي ان مامعه فلوس( مع انه له 8 شهور ومحوش اكثر من 8 الاف ريال ولا عمره حول لأهله ولا ريال )

وبيرحلونه على حساب الدوله والعقد اللي معك بليه واشربي مويته وهو المستفيد

الله يعافيكم عطوني الحل ابي طريقه تخليه عبره لمن يعتبر لانه مو وجه حشيمه بعد الصبر عليه

وتدريبه هذا جزاتي

ابي طريقة تخليه يرجع خسارتي او عالاقل تحرمه من الشغل وان المسلمين يبتلشون فيه مثلي