إيش الحل شغالتي جديدة ورافضة العمل؟؟؟
الحمد لله على كل حال جتني شغاله سيرلنكية ومسلمة ومن شكل ووجها إنها طيبة وأول يوم اشتغلت بتنظيف صالة البيت والبيت حقنا صغير واشترت لها المدام ملابس شتوية ومستلزمات النظافة الشخصية بعدين قالت أنا ما يبغى بزورة قلنا لها ما عليش وأنا عندي ولدين 8سنوات و5سنوات وبنت 3شهور ومن بعدها دخلت الغرفة وصارت تبكي وإذا كلمتها المدام ما ترد وفي رابع يوم كلمتها أنا وقالت أنا يبغى روح سيريلانكا وطول هذي الفترة وهي جالسة في غرفتها حاولت فيها على أساس أنقل كفالتها يمكن ما أعجبناها وهي رافضة نقل الكفالة تبغى الرجوع لسيريلانكا المشكلة إني مستقدمها عن طريق شخصي من مكتب معتمد في سيريلانكا وكلفتني بالتأشيرة 16000 وأنا الآن بلشان بعمري كيف الطريقة علشان أرد راس مالي طلبتكم تكفون عطوني حلول الله يعافيكم
|
اذا فيه خادمة من نفس جنسيتها عند احد الاقارب خلها تكلمها وتجلس معها يوم او يومين وباذن الله بيسهل الله امركم
تجبتي* |
مشكور أخوي فتى نجد على ردك بس المشكلة كل اللي حولي من الأقارب اللي عندهم أندونيسية أو أثيوبية أو فلبينية ، على العموم أنا كلمتها شخصيا وجيتها بوجه وكلام طيب وطرحت عليها نقل الكفالة عند أحد ما عنده بزورة والله بغت توافق بس ما أدري صارت تبكي شوي بعدين قالت أنا أبغى سيرلانكا صراحة أنا ما أبغى أظلم الحرمة ولا أبغى أخسر حقي بعد ، أبغى أحاول أوديها لمكتب الدعوة وتوعية الجاليات لعلي أحصل أحد يتفاهم معها والله يعين
|
طال عمرك .. أغلب الشغالات ومن جميع الجنسيات عند مجيئها لأول مره للعمل .. يبكون ويخافون وهذا شعور أنساني نظراً لبعدها عن اهلها وتغير معيشتها عموماً خليها تتصل على اهلها لمدة عشر دقائق أو اقل أو اكثر لكي تشعر بطمأنينه وبأذن الله سوف يتغير الحال أتمنى لك التوفيق |
هلابك اخوي ابو محمد
حاول تتصل بنفس المكتب الي في سيرلانكا وتفهم ايش المشكله او ارسل رقمك ع الخاص عندي مترجم سيرلانكي والله يسهل أمرك اخوي تحيتي |
عطنيها ممكن اقنعه وخذه منك تنازل
|
اخوي الظاهر مامرت عليك الافلام السيرلانكيه تراها اطلق من الهنديه بكثيييير
ماعليك منها توها جديده واكيد بتكون متضايقه ومستوحشه المكان في البدايه بس السيرلانكيات دايما كذا طنشها ولا تحاول تقنعها بأي شي هي بنفسها رح تهجد بس خليها تكلم اهلها يمكن يقدرون يقنعونها تجلس غير كذا اتركها في حالها ولا تكلموها دايما ترا اغلب السيرلانكيات يمشون كذا وذا جلست كم يوم على نفس الوضع قولها اذا تبين تسافرين ادفعي حق التذكرة يمكن تسكت وجرب تسوي نفسك معصب وكذا . كمل الفيلم اللي بدأت فيه |
ردها للمكتب اللي استقدمتها منه
|
رجعها للمكتب
اكيد عليها ضمان عند رفض العمل |
الله المستعان عليهم
|
ألف ألف شكر لكل من أتحفني برده الكريم ومشاركته لي في معاناتي حسبي الله على من كان سببها عموماً أنا مستقدمها عن طريق شخص يتعامل مع مكتب في سيرلانكا وهي حسب كلامها كانت تشتغل طباخة في الكويت والإمارات وأنها تجيد الطبخ ولم أجربها لأن زوجتي الله يحفظها لايعلا عليها في الطبخ ما شاء الله تبارك الله لاقوة إلا بالله ورفضت العمل كخادمة والآن كملت أسبوع صراحة تشتغل عندي الآن على خفيف بس شغل لك عليه يعني الله بالخير أو سيئ جدا يمكن عشان ما تبغى تشتغل كخادمة
على العموم الشخص اللي جابها لي أحد أعضاء هذا المنتدى وعندما كلمته أخلا مسؤليته وقال تبغى أبدلها ادفع رسوم 1500دولار تقريبا 5625ريال ويقول هذا هو النظام في السفارة هناك وأنكر أنه ضمن لي تحمل المسؤلية إذا رفضت العمل وبمشيئة الله سأفضحه وأبين الحقيقة في هذا المنتدى وفي القسم الذي يشارك فيه مع التوثيق لأجل ألا يقع أحد آخر فريسة له بس حتى أخلص من هالمسكينة اللي عندي |
أختي أم مشعل أنا ما أعرف للمراسلة على الخاص بس الخادمة عندي إلى الآن ولا أبغى أظلمها وأظلمك أبغاها إذا طلعت من بيتي ما ترجع ثانية وعشان أكون صريح معك أنا ما جربتها في الطبخ بس حسب كلامها إنها اشتغلت في الكويت والإمارات والسعودية طباخة بس وتقول أعرف أسوي مكبوس لحم ودجاج وفطاير وورق عنب ومحشي كوسة وأشياء ثانية ما أعرفها
|
اخوي
لايضحك عليك اللي جابها لك غصبا عنه يضمنها اذا رفضت العمل اتصل على السفارة في سيرلانكا وهم رح يقولون لك وش الخطوات بالظبط قبل ماتتجاوز ال 3شهور لا تتاخر واذا قدمت شكوى على صاحب المكتب في السفارة رح تصير له مشكلة انتا معاك الحق ولا عليك من احد |
مشكور أخوي / خالد على ردّك بس إن شاء الله إنها فرجت من رب العالمين لقيت من ينقل كفالتها براس مالها على أنها طباخة وشرطت عليهم عدم التجربة وأخبرتهم أني ما جربت طبخها عشان ما أغشهم والجماعة موافقين وأنا الآن ساعي في إجراءات نقل الكفالة والله يوفقها ويوفق كل مسلم
|
الله يعينك
|
هذي افلام السيلانيات معروفات العن جنسيه بالكذب والتدليس
بس لا تحاووول نهائيا تبين لها انك تبيها او تقنعها وقل رجعي خسارتي واذلفي ومن بكره تلاقيها تطير في البيت طيران وياليت تقول من صاحب المكتب لأخذ الحذر وبإمكانك تشكيه هو والسفارة اللي يتعامل معاها هذا أكيد جايبها هاربه او بريك ألطريقه عشان كذا متورط |
الأخ ، الأخت / ريما
السلام عليكم بالنسبة للمكتب في سيرلانكا ، والوسيط هو (أبوعمر2011) أحد أعضاء هذا المنتدى ، والمكتب اسمه ( أمجا ترفل ) في كولومبو ، على العموم أبشرك أنا أعمل الآن في إجراءات نقل الكفالة على أنها طباخة زي ما تبغى هي والله يوفقها ويوفقهم معها |
للأسف الطباخة رفضت العمل عند العائلة الجديدة بحجة كبرحجم المنزل وكثرة أفراده وأنه خارج الرياض حسبي الله عليها ونعم الوكيل ومن جابها
|
مرحبا اخوي أنا نفس الشي. اخذت خادمه جديده فلبينيه من مكتب تنازل وبمبلغ محترم. وبعد شهرين جات تقول أنا ما ابي الشغل البيت كبير وابغى اروح لاصدقائي وصدمتني بس وقتها حمرت لها العيون وقلت لها انتي ما تعرفي انظمة السعوديه تحسبي نفسك جايه سياحه وقلت لها مافي مشكله أنا بعد ما ابيكي وراح اكلم المكتب يرجع لي فلوسي واوديكي لهم. وخافت قالت لا المكتب يعاملنا سئ أنا افضل اسافر ولا اروح المكتب قلت لها مافي مشكله إذا تبين السفر ادفعي غرامه 5000الاف وقيمة تذكرتك وانا احجزلك وتمشين بالسلامه هذي قوانين البلد ما هي لعبه إذا ما عندك كلمي اهلك يدفعو عشان ترجعين لهم ومن وقتها صارت تقول راح اصير كويسه ارجوك جربيني وصرت ادلع واعيد لها الكلام وشوفها للان صار لها عندي 3سنين ما تبي السفر ومتهنيه انشاء الله تجربتي تفيدك بس نصيحه لا تطاوعها بزياده وشوف لك اي مكتب للخدمات ارميها عندهم يومين يفهموها وخذها مره ثانيه بس خليهم يفهموها انها راح تروح من بيت لبيت وما تقدر تسافر لازم تدفع غرامه والله يصلح الاحوال
|
الساعة الآن 03:24 AM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir